विदर्भ दखल न्यूज
गडचिरोली
पारदर्शक प्रशासनासाठी प्रत्येक शासकीय कार्यालयात स्वतंत्र माहिती अधिकारी कक्ष स्थापन करा!
माहिती अधिकार कायद्याची प्रभावी अंमलबजावणी करण्यासाठी माहिती व जनसंपर्क विषयातील पदवीधारक अधिकाऱ्यांची स्वतंत्र नियुक्ती करण्याची मागणी
जनतेतून व्यक्त होत आहे मत;
माहिती मिळविण्याची प्रक्रिया अधिक सुलभ आणि गतिमान करण्याची गरज
आजच्या काळात पारदर्शक प्रशासन, जनतेचा सहभाग आणि शासकीय कामकाजातील उत्तरदायित्व यांना विशेष महत्त्व प्राप्त झाले आहे. मात्र अनेकदा सामान्य नागरिकांना शासकीय कार्यालयांमधून आवश्यक माहिती मिळविताना अडचणींचा सामना करावा लागतो. माहिती अधिकार कायद्यांतर्गत माहिती मागितल्यानंतरही योग्य मार्गदर्शन, वेळेत प्रतिसाद आणि माहिती मिळविण्याच्या प्रक्रियेत नागरिकांना अनेक समस्यांना सामोरे जावे लागते, अशी जनतेतून भावना व्यक्त होत आहे.
या पार्श्वभूमीवर राज्यातील प्रत्येक शासकीय कार्यालयात स्वतंत्र माहिती अधिकारी कक्ष स्थापन करण्यात यावा, अशी मागणी नागरिकांमधून पुढे येत आहे.
या कक्षामध्ये माहिती अधिकार कायदा, माहिती व्यवस्थापन, जनसंपर्क आणि माहिती प्रसारण विषयातील पदवीधारक पात्र अधिकाऱ्यांची स्वतंत्र नियुक्ती करण्यात यावी. त्यामुळे नागरिकांना शासकीय योजनांची माहिती, कार्यालयीन कामकाजाची स्थिती, विविध निर्णय, विकासकामांची माहिती तसेच माहिती अधिकारांतर्गत आवश्यक मार्गदर्शन एकाच ठिकाणी उपलब्ध होऊ शकेल.
स्वतंत्र माहिती अधिकारी कक्षाचे संभाव्य फायदे
प्रत्येक नागरिकाला शासकीय माहिती सहज उपलब्ध होण्यास मदत होईल.
माहिती अधिकार अर्जांची प्रक्रिया अधिक सुलभ आणि शिस्तबद्ध होईल.
शासकीय कामकाजात पारदर्शकता आणि उत्तरदायित्व वाढण्यास मदत होईल.
नागरिकांच्या तक्रारी आणि माहितीविषयक अडचणींचे योग्य मार्गदर्शन करता येईल.
शासकीय योजनांची माहिती सामान्य जनतेपर्यंत प्रभावीपणे पोहोचविता येईल.
प्रशासन आणि जनता यांच्यातील संवाद अधिक मजबूत होईल.
शासनाने धोरणात्मक निर्णय घेण्याची गरज
माहितीचा अधिकार हा केवळ कागदोपत्री कायदा न राहता सामान्य नागरिकांच्या हातातील प्रभावी साधन ठरला पाहिजे. त्यासाठी प्रत्येक शासकीय कार्यालयात स्वतंत्र माहिती अधिकारी कक्ष, प्रशिक्षित कर्मचारी आणि निश्चित जबाबदारीची व्यवस्था असणे आवश्यक असल्याचे मत नागरिकांकडून व्यक्त होत आहे.
माहिती अधिकार कायद्याची प्रभावी अंमलबजावणी, पारदर्शक प्रशासन आणि लोकाभिमुख कारभार यासाठी शासनाने या मागणीचा गांभीर्याने विचार करून आवश्यक धोरणात्मक निर्णय घ्यावा, अशी अपेक्षा व्यक्त केली जात आहे.
प्रश्न एकच — जनतेला माहिती मिळविण्यासाठी कार्यालयांचे उंबरठे झिजवावे लागणार की प्रत्येक कार्यालयात माहिती मिळविण्याची स्वतंत्र व्यवस्था निर्माण होणार?
विदर्भ दखल न्यूज
गोर गरीब सामान्य जनतेचा बुलंद आवाज
मागणी तुमची, कलम आमची!
मुख्य संपादक : दिनेश रामाजी बनकर


Post a Comment