गडचिरोलीच्या सुपुत्राची नाशिकमध्ये शैक्षणिक भरारी;* कामगिरीने उंचावली पाथरगोटा गावाची मान.

विदर्भ दखल न्यूज 

गडचिरोली 

तालुका प्रतिनिधी आरमोरी 

गडचिरोली जिल्ह्यातील आरमोरी तालुक्यातील पाथरगोटा या लहानशा गावच्या सुपुत्राने नाशिकच्या शैक्षणिक क्षेत्रात आपल्या उत्कृष्ट आणि समर्पित कार्याने नवा इतिहास रचला आहे. नाशिक महानगरपालिकेच्या 'जिजामाता  विद्यालय, नाशिक' येथे शिक्षक (Assistant Teacher) म्हणून कार्यरत असलेले श्री. गोपाल मुरलीधर दोनाडकर यांनी आपल्या विद्यार्थ्यांना क्रीडा, कला, विज्ञान आणि बौद्धिक स्पर्धांमध्ये अभूतपूर्व यश मिळवून देत एक आदर्श निर्माण केला आहे.

विविध क्षेत्रांत विद्यार्थ्यांचे सुवर्णयश

श्री. गोपाल दोनाडकर यांच्या उत्कृष्ट मार्गदर्शनाखाली गेल्या वर्षात विद्यार्थ्यांनी विविध स्तरांवर खालीलप्रमाणे दैदिप्यमान यश संपादन केले आहे:

 * क्रीडा क्षेत्र: कबड्डी, गोळाफेक आणि लांब उडी या क्रीडा प्रकारांमध्ये शहरात प्रथम क्रमांक पटकावला.

 * चित्रकला: ४ विद्यार्थ्यांनी चित्रकला स्पर्धेत उत्कृष्ट कामगिरी केली.

 * नृत्य (डान्स): केंद्र स्तरावर तृतीय क्रमांक (3rd Rank) पटकावला.

 * NMMS परीक्षा: तब्बल ६ विद्यार्थी पात्र ठरले असून त्यात १ विद्यार्थी गुणवत्तेत (Merit) आला आहे.

 * शिष्यवृत्ती परीक्षा (Scholarship): मनपा स्तरावर इयत्ता ८ वी मध्ये सर्वाधिक ५ विद्यार्थी पात्र ठरले.

 * ISRO (भारतीय अंतराळ संशोधन संस्था) उपक्रम: २ विद्यार्थ्यांची इस्रो उपक्रमासाठी निवड झाली.

 * बौद्धिक स्पर्धा: सर्व ३ बौद्धिक स्पर्धांमध्ये प्रेम भोला पंडित आणि साईराज पंडित या विद्यार्थ्यांची निवड झाली.

गुणवंत शिक्षक म्हणून गौरव

विद्यार्थ्यांच्या या अष्टपैलू प्रगतीमागे श्री. गोपाल मुरलीधर दोनाडकर यांची अविरत मेहनत, जिद्द आणि योग्य मार्गदर्शन लाभले आहे. त्यांच्या या अलौकिक शैक्षणिक योगदानाची दखल घेत त्यांना 'गुणवंत शिक्षक पुरस्कार' शालेय *शिक्षण* *मंत्री* *दादासाहेब* *भुसे* यांच्या हस्ते सन्मानित करण्यात आले आहे. त्याप्रसंगी मनपा आयुक्त अमित रंजन, शिक्षणाधिकारी मनपा नाशिक डॉ. मिताली चौधरी, उपमहापौर शिंदे साहेब, अनेक नगरसेवक पदाधिकारी व शिक्षक वृंद उपस्थित होते

आपल्या यशाचे श्रेय देताना श्री. गोपाल दोनाडकर यांनी 'जिजामाता विद्यालय नाशिक'चे मुख्याध्यापक, सर्व शिक्षक वृंद आणि सहकाऱ्यांसोबत , त्यांना घडविणाऱ्या गुरुजनांचे, पाथरगोटा ग्रामवासिय, परिसरात नागरिक या सर्वांचे आभार मानले असून, सर्वांच्या सहकार्यामुळेच हे यश शक्य झाल्याचे नमूद केले.

गडचिरोलीसारख्या ग्रामीण व दुर्गम भागातून आलेल्या एका शिक्षकाने नाशिकसारख्या शहरात मिळवलेल्या या उत्तुंग यशामुळे त्यांचे मुळगाव पाथरगोटा सह संपूर्ण आरमोरी तालुका व गडचिरोली जिल्ह्याचे नाव उज्ज्वल झाले असून, सर्व स्तरातून त्यांच्यावर कौतुकाचा वर्षाव होत आहे.