*कुरखेडा तालुक्यातील गुरनोली गावातील तलाव फुटल्याने शेती पिकाचे झाले नुकसान.माजी आमदार कृष्णाजी गजबे यांचे कडून पाहणी

विदर्भ दखल न्यूज

गडचिरोली

कुरखेडा -

तालुक्यात गुरुवारी झालेल्या अतिमुसळधार पावसामुळे गुरनोली गावातील सुमारे 70 वर्षांपूर्वीचा तलाव फुटल्याने मोठे नुकसान झाले. तलावाचे पाणी प्रचंड वेगाने बाहेर पडून परिसरातील शेतांमध्ये शिरल्याने 10 हेक्टरहून अधिक शेतीचे नुकसान झाले आहे.

घटनेची माहिती मिळताच माजी आमदार कृष्णाजी गजबे यांनी घटनास्थळी भेट देऊन तलावाची व नुकसानग्रस्त भागाची पाहणी केली. तलाव फुटल्यामुळे लाखो लिटर पाणी शेतांमध्ये शिरून उभ्या पिकांचे मोठे नुकसान झाले असून शेतकऱ्यांसमोर आर्थिक संकट निर्माण झाले आहे. त्यामुळे नुकसानग्रस्त शेतकऱ्यांना तातडीने पंचनामे करून योग्य ती नुकसानभरपाई द्यावी, अशी मागणी शेतकरी बांधवांनी केली आहे.

दरम्यान, गुरनोली–पिंपळगाव मार्गही पाण्याच्या प्रवाहामुळे वाहून गेल्याने नागरिकांची वाहतूक विस्कळीत झाली आहे. संबंधित विभागाने तातडीने रस्त्याची दुरुस्ती करून वाहतूक पूर्ववत करावी, तसेच नुकसानग्रस्त शेतकऱ्यांना त्वरित आर्थिक मदत जाहीर करावी, अशी मागणी ग्रामस्थांनी केली.

यावेळी भारतीय जनता पार्टीचे तालुकाध्यक्ष माजी पंचायत समिती सदस्य चांगदेव फाये, ओबीसी आघाडीचे जिल्हा महामंत्री रवींद्र गोटेफोडे, भाजपा किसान आघाडीचे अध्यक्ष राकेश खुणे, अरविंद लांजेवार, माणिक लांजेवार, विवेक बुद्धे, देवानंद पाटील खुणे, नितीन खुणे, श्रीकांत गोबाडे, प्रमोद करंडे, ग्राम महसूल विभागाचे कर्मचारी तसेच ग्रामस्थ मोठ्या संख्येने उपस्थित होते.