सिंधी समाजाचा झुलेलाल चाळीसा महोत्सव भव्य उत्साहात संपन्न.. मा. आमदार कृष्णा गजबे यांनी घेतले दर्शन..

गडचिरोली सुपरफास्ट 

 न्यूज वृत्तसेवा 

देसाईगंज ब्युरो 

देसाईगंज: सिंधी समाजाचे इष्टदेव पूजनीय झुलेलाल सांईजींचा चाळीसा महोत्सव वडसा येथे भक्तिभावाने आणि मोठ्या थाटामाटात संपन्न झाला. हा धार्मिक सोहळा दि. १६ जुलै २०२५ पासून सुरू होऊन २४ ऑगस्ट २०२५ रोजी समारोपाला आला.

धार्मिक कार्यक्रमांचे आयोजन

या ४० दिवसांच्या कालावधीत साई वसणशाह दरबार, सिंधी वसाहत येथे दररोज प्रातः व संध्याकाळी आरती, सामूहिक भजन, सत्संग, प्रवचन, कथा व गीते यांचे आयोजन झाले. श्रद्धाळू भाविकांनी मोठ्या संख्येने उपस्थित राहून दर्शन घेतले. संपूर्ण परिसरात दररोज आध्यात्मिक वातावरण निर्माण होत असल्याचे पाहायला मिळाले.

आयोजक व आशीर्वाद

या महोत्सवाचे आयोजन प्रिय साईंबाबा दिलीपकुमार साहेबजी यांच्या संकल्पनेतून झाले. यासाठी परम पूजनीय पिता साई आत्माराम साहेबजी आणि बाबा साई सुखरामदास साहेबजी यांचे पवित्र आशिर्वाद लाभले होते. तसेच आसाऊतड साई वसणशाह दरबार उल्हासनगर ५ चे गादीनशीन हाजरांहुजूर साई कालीराम साहेबजी यांच्या मार्गदर्शनातून हा महोत्सव अधिक भव्यतेने पार पडला.

प्रमुख पाहुण्यांची उपस्थिती

महोत्सवाच्या शेवटच्या दिवशी आयोजित समारोप सोहळ्यास माजी आमदार कृष्णा गजबे यांनी उपस्थित राहून झुलेलाल सांईजींचे दर्शन घेतले. यावेळी त्यांनी आयोजकांना अशा पवित्र धार्मिक उपक्रमांत सातत्याने समाजाला सहभागी करून घेतल्याबद्दल शब्दांत गौरवले.

भाविकांचा उत्साह

चाळीस दिवस चाललेल्या या धार्मिक सोहळ्यात स्थानिक सिंधी समाजाबरोबरच इतर भक्तांनीही उत्साहाने सहभाग घेतला. मुले, युवक व महिलांनी स्वयंसेवक म्हणून जबाबदारी घेतली. विविध सांस्कृतिक कार्यक्रम, झुलेलालांच्या स्तुतीपर गीतांचा जल्लोष, तसेच धर्मप्रवचनांमुळे समाजामध्ये एकता, श्रद्धा व भक्तिभाव वृद्धिंगत झाल्याचे समाधान भाविकांनी व्यक्त केले.

समारोपाच्या निमित्ताने भक्तांना प्रसाद वितरण करण्यात आले. अखेरच्या दिवसापर्यंत वातावरण भक्तिरसात न्हाऊन निघाले होते.